BETAWI CINGKRIK
(Tribute for Faiz)
Pernah suatu kali almarhum kakek aye nyang bernama Husein pulang ke rumah dalam kondisi marah-marah. Tatapannye nanar, tangannye mengepal. Gerak bibirnye menunjukan bahwa beliau sedang ngumpulin ludah di mulutnye. Terus disemburin ke batang pohon cereme nyang tumbuh di pelataran rumah.
"Sialan banget nih hari gw ketemu begundal-begundal bauk kencur. Enteng banget die nyonyol. Masih mude tapi otaknye bebel gak ketulungan. Liat ntar, tunggu gw kasih makan ayam-ayam gw dulu. Ntar gw samperin die. Gw bikin kencing di celane."
BETAWI SEKARANG UDEH GAK ADE JAGONYE!!!
Itulah sebait kalimat nyang bikin kakek aye muntab. Beliau langsung minta aye buka laci nyang berisi koleksi keris dan goloknye. Dengan polos aye inget waktu itu sempet nanya: "Nyang mane goloknye, Kek?! Nyang gagangnye merah, ijo ape putih?"
Memang setiap golok nyang dipunye kakek aye tuh punya strip warna-warni di pangkal gagangnye. Paling banyak warna merah dan ijo.
"Yang ijo ajeh. Biar gampang dibersihinnye."
Aye pun dengan sigap ngambilin golok nyang dimaksud. Dalem pikiran aye nyang waktu ntu belon setaon masup SD: "Asik, kakek mau motong ayam lagi. Makan enakkkk. 😍
Sementara itu, Nenek aye langsung ngibrit keluar rumah. Aye bingung jugak kenape nenek lari-lari kayak dikejar kunti. Golok aye serahin ke kakek. Aye pun lanjut geragotin jambu aer nyang barusan aye petik.
Lalu tiba-tiba datanglah beberapa orang ke rumah.
+ "Kong Usin, sabar ye. Jan diambil ati omongan anak-anak. Die pade cuman maen-maen. Belon kenal die sama engkong usin."
-. "Ye justru itu gw mo kenalin ke die. Nih kenalin Usin. Jawara Betawi dari Rawe Belong. Biar dah tuak begini sepuluh orang maju gw sanggup abisin!"
+ "Iye, Kong. Udeh maapin ajeh ye, Kong. Nih orang tua anaknye dateng. Nih ade lupis ma kembang goyang buat nemenin engkong ngupi."
-. "Ngapah lu bawain gw kembang goyang?! Lu mau ngeledek gw jugak, hah?! Lu tauk gigi gw udeh gak ade tapi lu bawain nyang keras-keras!"
+ "Ye bukannye begitu, Kong. Pan bise buat cucu. Lagian kalo dicelupin di kupi juga lembek tuh gegaresan."
- "Gula ame kopinye gak lu bawain sekalian?"
+ "Bawa, Kong. Dah disiapin nih. Nih dibawain jugak tembako haji pi'i segumpel. Kapur sirih ame kawung juga dibeliin nih. Diterime ye, Kong. Damai-damaiii. Baekan deh kite."
-. "Mane tuh orangtue si anak belis?! Lu bapaknye tuh anak? Sini maju luh. Kali ini gw maapin yee omongan anak luh. Lu ajarin anak luh tata etika nyang bener. Jangan asal ngebacot. Kalo mo kenal jagoan betawi ikut gw sini. Gw kenalin. Kalo perlu gw jadiin die jagoan jugak. Orang mude modal bacot gede doang gak bakal bener idupnye! Ngerti luh?!
Kemudian Nenek ngajak masup orang-orang ke dalem rumah. Seinget aye cuman beberape ajeh nyang masup. Mereka ngobrol ame kakek sampe sore. Aye gak minat dengerin omongan orangtue. Aye lebih milih ngantongin garem terus nangkring di atas pu'un jambu sambil makanin buahnye.
Tapi sekilas aye denger kakek ngomong:
"Tuh, lu liat cucu gw. Bakat cingkriknye sih ade. Die lincah, gesit dan jago manjat-manjat. Tapi malesnye gak ketulungan. Diajarin kagak bise-bise. Kebanyakan ngejawab kalo dibilangin. Berenti gw ngajarin die cingkrik. Bawel! Mari-mari kagak sabar malah gw nyang jontorin mulutnye."
Diomongin begitu aye malah girangggg, karena tauk kakek udeh nyerah ngajarin aye. Pulang sekolah bisa bebas maen. Metikin belimbing, bungkusin jambu bangkok, motong-motong daon liane, bantuin nenek nebasin kelor, maen gangsing ame ngejar layangan. Uhuyyyy.
Kakek aye udeh wafat sekarang. Pas aye kelas 2 SMA. Semoga Allah ampunin dosanye dan masupin beliau ke syurga-Nye. Aamiin.
Koleksi golok dan kerisnye sebagian diwarisin ke muridnye. Sebagian lagi udeh dijual buat makan. Kalo diinget lagi, aye sekarang nyesellll banget dulu nyia-nyiain kesempatan buat belajar Cingkrik. Padahal tuh ilmu silat banyak manfaatnye. Bisa diturunin ke anak-cucu. Selaen buat bela diri juga kebanggaan nerusin tradisi betawi.
Cingkrik merupakan aliran silat khas Betawi. Dinamain Cingkrik karena ye emang model silatnye begitu. Banyak jingkrak-jingkrakannye.
Jadi dulu tuh ceritanye, ade jagoan betawi nyang abis merantau di Kulon pengen pulang ke Rawa Belong. Namenye Ki Maing. Belon sampe masup rumah, tongkatnye direbut sama monyet kepunyaan tetangganye Nyai Sareh.
Nah berebutan tongkat deh beliau sama monyetnye si Nyai. Die liat tuh monyet gigih dan lincah. Susah diuber dan pinter nangkis juge berkelit kalo dipukul. Besok-besoknye die perhatiin terus tuh monyet. Die pelajarin tingkah lakunye. Sengaje die maen rebut-rebutan tongkat sama si monyet biar bisa liat dan ngapalin gerakan si monyet nyang gesit, lentur tapi kuat.
Lama-lama Ki Maing kepikiran buat ngelatih diri pake gerakan si monyet. Dasar pesilat ye, jadinye malah die ciptain jurus-jurus silat dari gerakan dasar si monyet. Jadilah sekarang ntu silat dinamain Cingkrik.
Aliran bela diri cingkrik lebih banyak ngandelin pukulan daripade tendangan. Mangkanye sering juga disebut silat "maenpukulan". Di Kedoya ade Ki Goning nyang ngembangin jurus -jurusnye jadi lebih variatif. Selaen Ki Goning ade jugak Ki Sinan dari Kebon Jeruk. Mereka berdua ngembangin jurus Cingkrik. Meski beda aliran cingkrik, tapi gerakan dasarnye tetep same. Cuman beda di gaya "tarian" ame langkah kaki.
Pada saat ini, Cingkrik dikenal dengan gerakan 12 jurus dasar dan 3 jurus sambut. Ke-12 jurus dasar tersebut dinamain: keset bacok, keset gedor, cingkrik, langkeh tige, langkeh empat, buka atu, saupan, macan, tiktuk (bukan tiktok, yee), singa lo'be, dan longok.
Sedangkan jurus sambutnye ade sambut 7 muke, gulung dan abisin. Sambut disini tuh maksudnye lebih ke jurus buat bertahan saat dapet banyak serangan. Sambil bertahan, pesilat jugak sambil merhatiin gerakan lawan dan nyari celah buat "abisin".
Kalo ke-3 jurus sambut ame ke-12 jurus dasar itu kite gabungin buat pertunjukan seni, ntu namanye Bangbong. Bangbong ini nyang sering kite liat di pesta kawinan orang betawi nyang disebut "palang pintu".
Dalam tradisi pesta kawinan Betawi, ade beberapa perhelatan nyang kudu dilewatin calon mempelai pria sebelon ketemu Bapak calon bininye buat ngucapin akad. Biasanye penyambutan dimulai dengan meletusnye petasan berentet dibarengin qasidahan. Ondel-ondel sama penari topeng masup duluan. Selesai mereka beratraksi baru deh jagoan pantun dan pesilat pade masup.
Atraksi palang pintu biasanye dimaenin seabis adu pantun. Istilahnye: Udeh capek adu mulut, kite berkelahi ajeh deh. Kalo menang baru lu boleh kawinin sodare perempuan gw! Hehehe.
Jadi sesuai tradisinye, orang betawi rata-rata bukan cuman pinter ngomong, tapi juga pinter berantem meski dengan tangan kosong. Biasanye lawan dicecer dulu sampe gak bisa ngomong terus nantangin berantem. Baru dah diberi.
Tingkah begini bikin orang suka menilai orang betawi tuh emosian dan tukang berantem. Padahal kalo kenal lebih deket, orang betawi tuh sabar-sabar. Terus juga gampang surut emosinye. Gampang dibaek-baekin dan gampang lupa ame perkara nyang pernah diributin.
Adepun kalo die lagi ngomong blak-blakan ntu semacem usaha die lagi mancing emosi lawan. Biar bisa ngukur. Kalo lawannye sekirenye jago dan pinter maka die bakal tetep hormat biarpun kelak tetep jadi lawan bin musuh bebuyutan. Kalo lawannye diomongin dikit doang udeh kicep terus ngadu-ngadu ke orang laen biar keroyokan, ye selesai perkara. Gak bakal dianggep lawan, nyang ade bakal jadi bahan ledekan seumur idup. Bibir bisa langsung jebleh ngece-in meski cuman denger namenye.
Terus kapan pukulan nyosor atau golok lepas dari sarungnye?
Jagoan betawi gak bakal sembarangan maen pukul atau lepas golok kalo lu gak sengak-sengak amat. Lu bisa langsung nyobain ambekannye kalo lu ngehina emaknye, agamanye dan guru ngajinye di depan mukanye. Apelagi kalo lu nyerang fisik duluan.
Saat ini, Betawi lagi berduka karena kehilangan salah satu pesilat mude Cingkrik nyang tangguh. Namanye Faiz. Biase dipanggil Aiz. Faiz meregang nyawa terkena timah panas dari pak polisi.
Entah ape kesalahannye dan entah pegimane awal mulanye anak nyang baru tumbuh gede ini harus kembali ke pangkuan Illahi dengan cara nyang gak bise kite bayangin. Bikin ati berasa pedih dan pecah berkeping-keping. Apelagi pas liat aer mata emaknye plus curhatan sedih mpoknye Faiz. Banjirrrrr nih mata. Banjirrrr ampe bengkak.
Kite sebage rakyat jelata cuman bisa berharap kematian Faiz dan ke-5 orang rekannye bise diusut tuntas. Nyang salah dihukum, nyang bener dapet keadilan. Dunia-akherat kite bakal saksiin bareng-bareng. Semoga segera Allah tampakin mane nyang bener dan mane nyang salah. Aamiin.
Nyang jelas, kelak aura sedih masih bakalan terase. Saat kite melihat anak-anak kite berseragam merah keoren-orenan seperti baju silat Cingkrik kebanggaan Faiz. Nyang mane ntu bisa membuat kite jadi gak kuase ngebayangin:
"Ntar pade gede nih bocah-bocah pegimane nasibnye kalo nih negara masih begini-begini ajeh kondisinye?!" 😭
Selamat jalan, Faiz.
Insyaallah Faiz anak baek, anak sholeh nyang berbakti sama orangtua pasti masup sorga.
Allahummaghfirlahu warhamhu waafihi wafuanhu. Aamiin.
*In frame: Almarhum Faiz di salah satu atraksi palang pintu.
(By Aisha Rara)
