Kemendag ini sekolahnye dimane sih?? Woiiii, Pak, Situ kira-kira donk kalo nuduh warga nimbun minyak goreng !!!

Kemendag ini sekolahnye dimane sih?

Woiiii, Pak.

Situ kire-kire dunk kalo nuduh warga. Yang nimbun siape yang dicurigain siape? Beneran bisa kualat situ sama emak-emak.

Mending situ belajar dulu tuh arti kate nimbun! Berape banyak jumlah barang menumpuk yang bise dibilang nimbun. 

Sampah harian di dapur warga juga banyak, Pak. Tapi karena dibuang saban hari, maka kagak bisa dibilang warga lagi nimbun sampah di dapur. Begitu jugak dengan minyak goreng atau bahan masakan laennye. Lah, barang dipake tiap hari masa' situ bilang nimbun?

Kecuali tuh migor dibeli terus dikumpulin sampe banyak menuhin rumah terus dipajang doangan. Baru deh situ bisa bisa bilang warga lagi nimbun. Karena kosakata nimbun itu emang layaknye dipake buat orang yang ngumpulin barang sampe banyak terus gak diapa-apain tuh barang ampe jangka waktu lama.

Kalo dalem kasus migor, yang nimbun itu para pedagang yang kagak mau jual migornye sekarang. Karena nunggu harga jual mangkin mahal. Situ sebage pihak pemerintah juga bisa dibilang nimbun, kalo tuh migor ngendog di gudang dan kagak didistribusiin ke warga. 

Ini koq malah situ su'udzhon ke warga sih?

Sini, Pak. Deketan dikit ame warga biar situ bise liat realita. Noh, warga yang kebanyakan emak-emak berduyun-duyun ngantri migor banyak yang ngantri bukan buat dirinye sendiri. Bise jadi die bawa anak, suami, sodara atau orangtuanye buat ngantri ye karena emang kebutuhannye migornye banyak. Bisa jadi die pedagang makanan. Atau bisa jugak die beli banyak karena ade tetangganye yang ikut nitip karena gak bisa antri sendiri. Entah karena sakit, udeh sepuh, baru lahiran, dll.

Lagian situ tega amat nuduh warga begitu?

Emang sebanyak-banyaknye warga beli eceran tuh semane sih? Kalopun die sampe 20 pouch sendiri terus die jual lagi ntu jugak belon seberape. Lagian jugak gak mungkin ade yang begitu. Pan pembelian dibatesin seorang maksimal barang 1 ampe 2 liter. Die mau situ tuduh ape? Bayar orang buat ngantri biar bise sebanyak itu? Malah tekor dunk.

Lagian kalo die beli eceran terus dijual lagi sama yang jagsk may ngantri ntu paling seberape sih untungnye? Bandingin ame agen gede yang nimbun ampe ratusan bahkan ribuan. Kagak seberape, Pak ame keuntungan uasa ngantri yang die kumpulin.

Justru yang kudunye situ curigain tuh orang-orang instansi situ srndiri. Kenape katenye mintak banyak tapi gak nyampe ke warga? Kenape distribusi bisa terlambat? Kenape begitu pengumuman migor di subsidi hesoknye migor malah langka di pasaran? Situ selidikin dah!

Ditambah situ kudu cari tauk jugak kenape sekarang banyak muncul pedagang migor dadakan tapi yang biase dagang malah gak punye barang? Sape tauk mang ade mafia migor yang sengaja bikin negara runyam.

Jangan malah warga jelata yang situ curigain. Warga udeh susah idup diurus situ malah situ tuduh ini-itu. Mending mundurlah kalo emang gak mampu! Ngurus minyak ajeh berbulan-bulan kagak becus. Bukannye malu malah asal ngomong ajeh. 

Nih omongan ngasal situ malah berpotensi nambah rusuh tauk gak! Warga bukannye jadi adem malah bise tambah saling curiga! Noh, situ liat sekarang ajeh dah muncul pengkotakan teritorial di beberapa tempat. Warga yang mau beli migor kudu nunjukin KTP. Kalo gak tinggal di wilayah itu kagak boleh beli migor di warung/minimart di wilayah tersebut. Parah banget, kannnn. 

Sekarang tambah omongan situ kayak gituh bise jadi mangkin kenceng rasa curiga warga terhadap satu sama laen karena berasa gak adil. Yang punye duit terbates, susah dapet migor mulai curiga dan ngiri ame tetangganye yang gampang dapet migor. Mulai ngerasa karena mereka orang susah, tinggal di tempat susah, maka susah dapet migor. Mangkinan dah tambah ngerasa susah dan disusahin negara.

Situ gak sadar ape, Pak?

Salah satu pemicu kerusuhan sosial ye itu kecemburuan sosial. Saling curiga, saling ngiri, saling ngerasa gak diperlakukan secara adil. Situ jangan dikire warga yang punye duit juga gak eneg dengan kondisi begini. 

Orang punye duit kalo barangnye langka ape yang mau dibeli?

Orang milih belanja di mart-mart buar nyaman tapi kalo liat antrian yang beli migor mengular ape gak terganggu jiwa raganye? Raganye berasa sumpek. Jiwanye ape lagi. Gak tega liat emak-emak yang kudunye dimuliakan malah desak-desakan bahkan sampe ade yang jadi ribut gegara pingin dapet migor doang. 

Etttdah nih kite idup taon berape sih? Hampir 80 taon merdeka kenape kayak balik lagi ke cerita pas awal-awal lepas dari penjajah! Muke gileeee.....

Jadi mendingan situ mikir dulu sebelon ngomong deh, Pak. Jangan sekate-kate jadi pejabat. Situ yang gak becus kerja kenape malah nyalahin warga?! Huasyemmmm.

Situ pejabat mane ade pernah ngerasain jadi jelata yang kudu ngantri migor sampe begitunye? Nih situ liat dah foto ini dan bayangin situ ngantri bareng mereka. Bo'ong kalo situ gak ngerasa ngeri tapi kudu harus ngantri karena kebelet laper. Sedangkan toko lain lagi gak pade jualan!

Jan pade belagak pilon deh pade! 

Empet aye tuh! Lima dah kalo buat situ!!!

Ttd

(Aisha Rara)